Syndicated from Vanglaini Daily.
Vanglaini Daily
- ERC Report sorkarah thehlut Zirtirtu tha lo tam vangin zirna tha lo: CM - Mizoram Education Reforms Commission (MERC) chuan kum khat chhung Mizoram zirna siamthat dan tur an zirchian hnuah, nimin khan Mizoram sorkarah an report an thehlut.
Report hlanna hi I&PR Auditorium-ah neih niin, MERC Chairman, Prof. AK Sharma-in Chief Minister Lal Thanhawla kutah a hlan a ni. CM Hawla chuan, Mizoram zirna that loh chhan chu zirtirtu tha lo an tam vang a nih thu leh, Commission chu Sharma Commission tih zui a nih tur thu a sawi.
MERC report inhlanna inkhawm hi Education Minister, Lalsawta'n a kaihruai a. Chief Minister chuan, Mizorama zirna that loh chhan chu zirtirtu tha lo an tam vang a nih thu sawiin, Commission report tha thei ang ber pawh nei mah ila, zirtirtute leh Mizo mipuite'n tumna tak tak leh inpekna an neih a ngai," a ti.
Sorkar hnathawk zingah mahni hna aia hlawh buaipui zawk an tam nia a lan theih thu sawiin, "Darkar thum vel lek thawkin, hlawh sang zawk kan phût thin," a ti. Lal Thanhawla chuan, thil tha tih tumna kawngah khawtlang thil chu harsatna siamtu a ni thei tih sawiin, zirtirtute leh zirlaite tan zirna tichhe khawpa khawtlanga inhman tha a tih loh thu a sawi.
Mizorama zirtirtute chu national norms aiin an tam a, mahse zirtirtu indaih lohna a nasa em em a, thingtlangah zirtirtu an indaih lo hle si niin CM Hawla chuan a sawi a, "Khawpuia awm turin kan insawipui luai luai thin," a ti.
Zirtirtu lak tum mek chungchangah, trained teacher zingah english, science leh mathematics zirtir thei tur thiam tak hmuh loh an hlauh thu sawiin, "Mathematics, Science zirtir thiam miah lo la ila, kan zirna kan tichhe vek a ni ang," a ti.
Chief Minister chuan MERC member-te chungah lawmthu sawiin, tih tak zeta hna an thawhnaah a fak a; MERC chu kum 50 chuang kal taa Central-in Education Commission a siam hnua Central leh state anga Education Commission din leh hmasak ber a nih thu sawiin, CM Hawla chuan, Report thehluh tak pawh hi Prime Minister, Union HRD Minister leh UPA Chairperson-te pek an nih tur thu a sawi.
Education Minister Lalsawta chuan, "Vawiin hi ni pawimawh bik, Mizorama zirna siamthatna tura ke pên tanna ní a ni," a ti a. Zawhna chhangin, Commission report chu Mizoram sorkar expert team-in a zirchiang phawt ang a, expert team chu recommendation a siam lehchhawng dawn thu leh, a tak taka hman hun tur sawi theih a la nih loh thu a sawi.
MERC Report thehluh tâk hi a hmingah "Towards an Enlightened and Inclusive Mizo Society" tih a ni a, a bu-a siam niin, Chapter 15 a awm a ni. Commission hian June 19, 2009 khan hna an thawk tan a, hna an thawh chhungin Mizoram hmun hrang hrangah zirna-inte tlawh kualin, tum eng emaw zat an thukhawm a; India rama dan awm mek te, sorkar hriattirna chhuah tawh te, National Education Policy te, committee report leh research report-te zir hmasak a ni bawk.
Nimina report inhlanna hunah hian Commission member zingah - member secretary Prof. S.Hom Chaudhuri, Prof. Ved Prakash, Prof. GL Arora, Dr LN Tluanga, Revd Chuauthuama, Prof. AN Rai, K Riachho, Esther Lalruatkimi leh Dr Lalrindiki Fanai te an tel a; Rev.Dr K Thanzauva erawh chu remchan lohna avangin a tel lo.
Commission member-te hnenah hian Mizoram sorkar chuan certificate leh lawmthu sawina thilpek a pe vek a ni. - C'Wealth Games meichher Aizawlah -
October 3-a New Delhi-a tan tur, Britain awp tawh thin ramte infiamna hmanga inelna, Commonwealth Games vawi 19-na meichher, Queen's Baton Relay (QBR) chuan nimin khan Aizawl rawn thlengin, khawpuiah tlan kualpui a ni a, tlan kualpui zawhah Vanapa Hall-ah Chief Minister Lal Thanhawla hoin a lawmna hun hman a ni.
QBR hi Commonwealth Games Organising Committee-a mite'n rawn kengin, Lengpui airport-ah Sports & Youth Service Director, Zoliana Royte kutah chawhnu dar 1:48 khan an hlan a. Sports Director hian Mizorama QBR Organising Committee Chairman, Van Hela Pachuau, Chief Secretary kuta a hlan hnuah tlanpui nghal a ni. Airport atangin motor-in Aizawl panpui a ni a, Bawngkawn atangin Aizawl khawpuiah tlan kualpui a ni.
GBR kenga tlanpuitute hi Mizo infiam mi langsar te, Sports Minister hlui te, sports association hruaitute, sorkar official leh NGO hruaitute an ni a; an tlanpuina kawngah hian kawng sir tluanin mipuiin enin, an lo lawm hle a ni. Tlai lam dar 4:48-ah Vanapa Hall thlenpui niin, Chief Minister Lal Thanhawla hoin inkhawmpui a ni.
CM Lal Thanhawla chuan, Mizoramin infiamna lamah hma a sawn zel thu sawiin, "Hmanraw tha, hmun tha nei lo leh, coach lama kan la tlachham chung pawhin sports lamah hma kan sawn ve zel a. Lammual hi awm lo phei se chuan kan kâwt dèr a ni mai a; heti chunga Santosh trophy-a quarter final kan thleng thei hi a ropui hle a ni," a ti. Infiamna lama Mizo thalaite hmasawnna turin theihtawp an chhuah mek thu leh, Rajiv Gandhi Stadium puitlinna tur pawh sorkar laipuiin pek an inhuam a sawi.
Lal Thanhawla chuan, infiamna chu ram ri nei lo, inthianna leh inunauna tha tak a nih thu sawiin, infiamnaa hmasawn tur chuan chi leh chi inkarah inthliarna a awm loh a tul thu a sawi a; Commonwealth Games chu Mizo thalaite'n infiamnaa hmasawnna atan hmang se a duh thu sawiin, "A hmuna kan kal a, kan en thei lo a nih pawhin inzirna atan kan hman tangkai thei ngei ka beisei," a ti.
QBR hi October 29, 2009 khan Buckingham Palace atangin Queen Elizabeth II-in a vailiam a, Commonwealth ram hrang hrangte fanpui a nih hnuah June 15, 2010 khan Pakistan atangin India ramah luhpui a ni.
India ramah state hrang hrang fan kualpui a nih hnuah October 3 khian Commonwealth Games hawnna hmun tur, Jawaharlal Nehru Stadium, New Delhi a thleng ang a, Games hawn zui nghal a ni ang. QBR hi nizan khan Aizawlah a riak a, vawiin hian Kolkata panpui a ni dawn a ni. - Commonwealth Games meichher pualin CM leh Minister-ten thing phun - Chief Minister Lal Thanhawla, Mizoram Olympic Association President leh Indian Olympic Association Vice President ni bawk chuan nimin zing khan Mualpuia Rajiv Gandhi Stadium sak mek a tlawh a; stadium sak mek chhehvelah hian vawiina Aizawl rawn thleng tur, Commonwealth Games meichher pualin thing phun nghal a ni.
Thing phun hmain Chief Secretary, Van Hela Pachuau kaihhruaiin inkhawm tawite neih a ni a. Chief Minister chuan, ramngaw chereu tawh siamthat leh nan thing leh mau humhalh a tul bakah, ram ruakah thing tam zawk phun belh a ngaih thu a sawi a, "Ramngaw humhalh leh thing phun hi Forest department hna chauh ni loin, mi zawng zawng mawhphurhna a ni a, a phun tluk zetin a enkawl puitlin pawh a pawimawh a ni," a ti.
Commonwealth Games vawi 19-na, Delhi-a neih tur chu India rama thil thleng chhinchhiah tlâk a nih thu sawiin, Lal Thanhawla chuan, hlawhtling takin India-in a thlen tur thu a sawi a, "Mizoram sorkar pawhin Mizo thalai infiammite thiamna leh theihnate khawvel hriata phochhuah ngei a duh a, chumi atan chuan sorkarin theihtawp a chhuah zel dawn a ni," a ti a. Stadium sak mek chu chak tak a kalpui a nih thu leh, Planning Commission-ah additional assistance atan cheng vaibelchhe 70 thlen leh tawh a nih thu a sawi bawk.
Inkhawm hman zawhah hian Chief Minister bakah, Minister, Parliamentary Secretary, MLA, sorkar official-te leh CM Hawla nupui Lal Riliani ten thing tiak thahnem tak an phun a ni. - Mizoram tan IAS post tipung - Indian Administrative Service (IAS), Arunachal Pradesh-Goa-Mizoram-Union Territories (AGMUT) cadre post chu sorkar laipuia Ministry of Personnel, Public Grievances and Pensions chuan 183-ah a tipung a, hemi rual hian Mizorama IAS post zat pawh 20 atangin 29-ah a tipung.
Mizoram sorkar tan IAS officer post tihpun a nih takah hian, Secretary hna bakah, district tina Deputy Commissioner (DC) post chu IAS post atan tih a ni a; hei bakah hian, Food Civil Supplies & Consumer Affairs, School Education Department leh Industires Director hnate chu IAS post atan dah a ni bawk.
District DC hna hi tun hma deuh tawh atangin IAS post lo ni tawh mah se, Mizoramah chuan IAS ni lo, MCS-te pawhin an chelh ve thin a, tunah pawh IAS ni lo chelh an la awm nia thu dawn a ni. Supply Director hi K Riachho, IAS-in a chelh mek a, Secretary hna nen a kawpthung a; Education Director hna chu IRS Officer, Esther Lalruatkimi'n Secretary ni chungin a enkawl kawp a ni.
Hetihlai hian Mizoram sorkara Principal Secretary, L Tochhong chu National Capital Territory of Delhi-a thawk tura sawn a ni a; a chawlh hman mek August 31-a a zawh hnuah a hna thar hi zawm nghal tura beisei a ni.
L Tochhawng enkawl department zinga mi, PHE chu C Lalsawta'n a chang ang a, Agriculture leh Minor Irrigation chu Vanengmawia'n a chang rih ang.
Hetih lai hian, Cooperative Societies Registrar hna chelh turin AGMUT:2005 cadre IAS officer, Niharika Rai ruat thar a ni a; AGMUT:2005 cadre IPS Officer, Madhur Verma pawh Chandigarh atangin Mizoramah sawn a ni a, ani hian Mizoram sorkarah joining report a pe tawh nâ a, a hna chelh tur siamfel a la ni lo.
Mizorama IAS officer post-te:
Chief Secretary, Development Commissioner, Secretaries, Secretary to Governor, Secretary to CM, Cooperative Societies Registrar, Special Secretaries, FCS&CA Director, Industries Director, Education Director, DC leh Resident Commissioner. - Cabinet-in a thuphunga a pawm angin Pay Rules Law deptt-ah pe - Central 6th Pay hman tur chungchangah, Finance department chuan June thla tawp lam khan ‘Mizoram (Revision of Pay) Rules, 2010’ chu Law department zirchian turin a thehlut. Hetih lai hian, ‘Mizoram (Revision of Pay) Rules, 2010’ ah hian ruahmanna thar engmah tarlan a ni lo.
Finance hotute hnen atanga thudawn danin, ‘Mizoram (Revision of Pay) Rules, 2010’ ah hian hlawh chungchanga ruahmanna thar tarlan a ni lo a; Cabinet Sub-Committee on 6th Pay Implementation-in rawtna leh service hrang hrang 53-in lungawi lohna an theluhte a ngai anga tarlan a ni. Law department-in an enfiah hnuah Cabinet pawmpuina a ngai dawn a, Cabinet hian pawmpui mah se, awmzia a awm chuang lo nia thu dawn a ni.
Cabinet Sub-Committee on 6th Pay Implementation rawtna hi Cabinet chuan a thuphunga pawmin, siamthat ngai zualbikte endik nise, a ti a, mahse endik tur ruat an la nih si loh avangin Finance lam chuan a ngai angin Law department en turin an thawn a ni. Zawhna chhangin Finance department lam chuan, "Sorkarin endik ngai zualte endik tura min hrilh loh bakah, endik ngai zual bik engmah min hrilh si loh avangin kan khawih che ngam lo," an ti a, endik ngai zual chin tur hriatthiam a harsat tur thu an sawi.
Thudawn danin, sorkart hnathawkte'n allowances hrang hrang an dawn chungchangah Cabinet Committee on Pay chuan Central-in a pek thin chu rate thar a siam angin pek leh tur leh, Mizoramin a pek thin pawh a ngai anga pek ni se, an ti a. Hetih lai hian, Central-in a hnuaia hnathawkte allowance ang Mizoram sorkarin a pek loh a awm nual a, Central-in a pek ang ni lo, Mizoram sorkarin a pek si tam tak a awm bawk avangin, siam rem ngai a awm nual dawn a ni.
Mizoram sorkar hnathawkte'n 6th Pay an hman theihna tura Cabinet Sub-Committee on Pay rawtna hi Cabinet-in a thuphungin pawm tawh mah se, siamthat ngai a awm nual thu leh, Cabinet in endik ngai zual endik tura a tih thu thudawnna chuan a sawi a, "Endik tur committee ruat a la ni si loa, engtik nge hman tan theih a ni dawn hriat a har hle," a ti. Hetih rual hian, Cabinet Sub-Committee rawtna anga hman tur a nih erawh chuan, Cabinet-in ‘Mizoram (Revision of Pay) Rules, 2010’ a pawm hnuah hman mai theih tur chu a nih tho thu a sawi bawk. - Sorkar kal danah MTP hlauthawng - Mipui |angrual Pawl (MTP) chuan, Congress sorkar chu a kalphung an siam that loh chuan, Mizoramah sorkar inrêlbâwl dan chhe lehzual a piang ang tih an hlauthawng.
M|P hruaitute hi Inrinni khan Aizawl Press Club-ah an thukhawm a, Mizoram sorkarin corruption a do dan te, hmasawnna hna a thawh dan te, hnaruak hnawhkhah a tum dante leh, mipui rawng a bâwl dan hrim hrimte an sawiho a ni.
An thutkhawm hnuah thuchhuah siamin, M|P chuan, sorkar chu corruption zungzám chhuina chi reng reng a zuih zawng zela kalpui tum nia an hriat avangin, corruption do kawngah an intiam ang leh mipui beuisei ang an phâk dawn lo hlein an hria a; hmasawnna hna thawh kawngah leh hna ruak hnawhkhah danah pawh, rah tha chhuah thei tur lam aiin, party mi induhsakna lamah kal nasa ta deuhin an hre bawk tih an tarlang.
MTP chuan, kum 2008 Assembly inthlanah khan, ram mamawh chhanna a nih beiseina sang tak nen, Congress party kha rorelna chang turin duhsakna a lo hlan tawhtih an sawi a; hnehna changa sorkar an din pawhin, sorkar hotute tawngkam ngaihnawm tak takte chu thlamuanthlak a ti a, Mizoramah sorkar tha a din theihna turin, sorkar thar chu phur takin an lo tawiawm thin tih an tarlang a ni.
Congress sorkar kum khat leh a chanve a din tâk chhungin, sorkarin commission dina chinfel ngai chingfel tura a sawmnaah leh, sorkar din committee hrang hrangah pawh, member atana a sawmnaahte chuan, a remchang apiangah MTP hruaitute chu, theihtawp chhuahin an lo pên chhuak thin tih an sawi bawk.
Hetih lai hian, party mi duhsak tum vang ni ngeia ngaih theiha thawktu lâk thar dawn vanga School Education department-a dan dinglai tihdanglam tumna lo awm ta te, dikna tun din duh vang ni hauh lo, chungnun inchuh vang nia ngaih theiha Judiciary leh Executive inepna awm fo ta te, corruption zungzám chhuina chi reng reng, a zuih zawng zela kalpui tumna lo awm tate chuan, sorkar inrêlbâwl dan chhe lehzual a hrin an hlau ta hle niin MTP chuan a tarlang bawk.
MTP chuan, an thupui ber chu Mizoramah sorkar tha, mipui sorkar tungding tura theih ang anga thawh a ni tih a sawi nawn leh a; mipui sorkar ni lo, party sorkar bawk tun din leh a nih chuan, Mizoramah sorkar tha a awm theihna tura a lo beih tawh thin chu chhunzawm leh an tum tih an tarlang a ni. - MJA-in chanchinbu kalphung sawiho - MJA Gen.Hqrs chuan nimin khan Aizawl Press Club-ah General Body Meeting an nei a, thuthar thehdarhtute'n ram leh mipui tana tangkai zawka hna an thawh theih dan turte an sawiho. Meeting hi MJA President, H Zosangliana'n a kaihruai a, MJA Vice President, Vanlalrema Vantawl leh MJA President hlui, K Sapdanga ten paper an present a ni.
Vanlalrema Vantawl chuan, thuthar thehdarhtute zalenna chu Indian Constitution Article 19-a Right to Freedom of Speech and Expression tlawhchhana siam a ni tih sawiin, zalenna hmang sual lo turin chanchinbu mite a chah a; sorkar thiltih dan leh hnathawh dan mipui tana hriat tul hâi chhuah kawngah RTI Act awm tawh mah se, "Sorkar hnathawk tam takin zêp duh chin an neih thin avangin, RTI Act hi a nih ang turin hman a harsa thin a ni," a ti.
MJA Vice President chuan, chanchinbua thuchhuah turte chu a dik ngei tih finfiah hmasa thin turin chanchinbumite a chah rualin, a tul hunah chuan an thu chhuah chu Court-a dinpui ngam turin a fuih. Chi leh chi inkara buaina tichhuak thei tur chi chhuah kawngah te, pawngsual leh hmeichhe tihhmingchhiat theihna chungchangah te, Court, Parliament leh Assembly thuchhuak chhuah kawngahte fimkhur turin a chah bawk.
K Sapdanga chuan, journalist chhungkuaah lungrualna, hnaa inpekna, fimkhurna, chêt dan mawi leh inzir zau a pawimawh tih sawiin, thuthar thehdarhtute chu mipuite leh ram rawng an bâwlnaah an tangkai dan a zira zahawm an nih thu a sawi a; thuthar thehdarhtute chu party tan bik emaw, hotu bika ngaih emaw nei lo a, ram leh hnam tana ngaihtuahna sênga mipuite thudika kaihhruai tum turin a chah. - 2011 Dec-ah Mizoram khaw tinah internet: Sachin Pilot -
Union Minister of State for Communication and Information Technology, Sachin Pilot chuan, BSNL kaltlangin 2011, December-ah chuan Mizorama thingtlang khaw tinah broadband internet hman theih a nih tawh tur thu a sawi.
Sachin Pilot hian nimin khan I&PR Conference Hall-ah thuthar thehdarhtute kâwmin, BSNL EVDO leh WiMAX Services-te a hawng nghal a; hemi hma hian |huampui Telephone Exchange-ah Wireless in Local Loop Main Switching Centre (WLL MSC) a hawng bawk. Union Minister hi Mizoram Information & Communication Technology Minister, Zodintluanga'n a tawiawm zel a ni.
Pilot chuan, 2011 June-ah chuan Mizorama RD Block headquarters zawng zawng broadband internet-a thlun zawm tum a nih thu a bsawi bawk a; Mizoramah Software Technology Park din tum a nih thu a sawi tel.
Sachin Pilot chuan, Mizoram chu UPA sorkarin inbiakpawhna lamah service tha ber ber pek a tum thu sawiin, cheng vaibelchhe 4.5 vel man WLL MSC hawn a ni ta chu Mizo mipuite a lawmpui thu a sawi a, "Thingtlang kilkhawr zawkte internet leh mobile phone hmanga thlun zawm zel tum a ni," a ti.
Tun dinhmunah Mizoramah BNSL mobile phone connection 91,000 a awm thu leh, service tha zawk a awm theih nana tan la turin BSNL officer-te a hrilh thu a sawi.
Union Minister chuan, "Sorkar laipuiin Mizoramah Software Technology Park siam a tum a, ruahmanna pawh siam a ni tawh," a ti a; Software Technology Park hi siam a nih chuan, Mizoramah business process outsourcing (BPO)-te pawh a awm thei dawn tih sawiin, chu chuan thalai lehkhathiamte eizawnna kawng a hawnsak tur thu a sawi bawk.
Minister chuan India ram hmun dangin a dawn ang IT lama hmasawnna dawn chu Mizo mipuite chanvo a ni, tih a sawi a; tun tuma BSNL-in a bun thar inbiak pawhna changkang zawkte chu thalaite leh thingtlang mite tana tangkai a nih tur thu a sawi.
BSNL Director (Customer Mobility), RK Agarwal pawhin, Mizoramah WLL MSC, EVDO leh WiMAX te hawn a ni ta chu lawmawm a tih thu sawiin, "Inbiakpawhna lamah Mizoram chu khawvel rualin a kal a ni," a ti a; nimina an thil hawn tâkte chuan Mizorama inbiakpawhna tha zawk a pek ngei a beisei thu a sawi.
|huampuia WLL Main Switching Centre-ah hian Base Transciever Station (BTS) pahnih bun a ni a; hemi hmang hian EVDO subscriber 1,200 vel châwm thei tura beisei a ni. BSNL hotute chuan, Aizawlah BTS dang pathum leh Lungleiah pakhat la bun leh tur a nih thu an sawi.
EVDO hi wireless broadband service a ni a, hemi hmang hian India ram khawi hmunah pawh internet a hman theih a; Wimax hi internet chak taka hman theihna a ni bawk.
BSNL service tihthat dan tur sawiho
Union Minister of State for Communication & Information Technology, Sachin Pilot hoin July 21 khan I&PR Conference Hall-ah BSNL Review Meeting neih a ni a; hmarchak state-a Telecom infrastructure dinhmun thlirho niin, a tihchangtlun dan tur leh thuamthat dan tur te, leh mobile phone leh broadband internet service tihthat dan turte an sawiho.
Sachin Pilot chuan, meeting neih chhan chu hmarchaka BSNL-in harsatna a tawhte sutkian nana rawtna siamna tur a nih thu sawiin, New Delhi-a BSNL Corporate Office chu hmarchhaka Telecom infrastructure siamtha turin a inhawng reng tih a sawi a, "Hmarchhak chu a leilung a dan avangin hnathawh harsa mah se, tum chuan theih loh a awm lo," a ti.
Union Minister chuan, hmarchak biala BSNL service hrang hrangte, a bikin mobile service chu tun aia tha zawka siam a tul thu a sawi a; Mizorama USOF Tower 35 zinga panga la din loh chu hma la vat turin BSNL hotute a hriattir nghal a ni.
Hmarchhak state pumah hian BSNL Telephone Exchange 1,119 awmin, wired line capacity 12,31,260 zinga 6,43,587 hman mek a ni a; WLL capacity 4,00,750 zingah 2,48,337 hman mek a ni. BSNL mobile phone connection 21,46,170, broadband internet connection 84,643 a awm bawk.
Mizoramah chuan BSNL hian Telephone Exchange 67 a nei a; wired line capacity 74,400 zinga 55,136 leh WLL capacity 24,000 zinga 15,351-in hna an thawk mek. Mobile phone connection 92,876, broadband internet connection 4,211 leh internet connection dang 32,586 a awm bawk a ni.
Union Minister hoa meeting-ah hian BSNL Corporate Office, New Delhi hotute leh hmarchaka BSNL hotute an tel a ni. - CADS ruihhlo man hâl ral -
Central YMA hnuaia ruihhlo dotu, Central Anti Drug Squad (CADS) chuan May 29 atanga July 20 thlenga ruihhlo an man tawh, Excise leh Police hnena an hlan loh zawng chu nimin zing khan Central YMA Hall kawtah an hâl ral. He ruihhlo hâlna hun hi Chief Secretary, Van Hela Pachuau-in telpuiin, mei a dep kai a ni.
Nimina ruihhlo hâl ral tâkte hi - proxyvon/parvon mûm 25,891; heroin hawng 5, cane 150 leh chhinsen 100; nitrosun mûm 450 leh, ganja kg. 5 an ni. Excise/Police hnenah proxyvon/parvon mûm 15,817; heroin hawng 14, cane 108 leh chhinsen 180; nitrosun mûm 180 leh ganja kg. 47 an hlan tawh a; Excise/Police-ah hian mi 45 an hlan tawh bakah, Home-ah mi pariat an dah tawh bawk. May 29 a\anga July 20 thlenga ruihhlo an man tawh hi Rs. 36,60,286 man vela chhût a ni.
Chief Secretary chuan, Mizorama ruihhlo leh sualna chi hrang hrang a tam dan chu hriat phak loh khawpa tam a nih thu sawiin, "Mipat hmeichhiatnaah hian Sodom leh Gomora kan tluk thuak ang. Sual hi a zalen tawh lutuk," a ti a; Setana biate zingah kohhran thalai pawla tel \hinte pawh tel an awm thu leh, ruihhlo ni lem loah pawh thil a \ha lo zawnga ngawlvei hrim hrim a nasat thu a sawi.
Van Hela Pachuau chuan, Mizote zingah corruption a tam thu sawiin, "Sual hi kan ngaizam ta lutuk a; keimahni ham\hatna tur ringawt kan ngaihtuah. Kan duh chu dik, kan duh loh chu dik loah kan ngai mai tawh a ni," a ti.
Chief Secretary chuan, sorkar hnathawk zingah pawh rinawm lo leh mahni ham\hatna tur ringawt ngaihtuah an tam thu sawiin, Abraham Lincoln-in 'Government of the people, by the people and for the people' a lo tih \hin chu 'Government of the employee, by the employee and for the employee' ti hiala mi \henkhatin a sawi tawh thu a sawi bawk.
Ruihhlo hâl hma hian inkhawm tawitê neih niin, CYMA President Lalchungnunga'n a kaihruai. He hunah hian CADS \anpui nan Synod Social Front-in Rs. 50,000, Vaivakawn Presbyterian Kohhranin Rs. 5,000, Kulikawn Presbyterian Kohhranin Rs. 5,000 leh Khatla Branch YMA-in Rs. 5,000 an hlan.
Synod Social Front hminga tanpuina hlantu, Rev. Lalzuithanga, Executive Secretary chuan, CADS hmalakna chu an thlawp tlat thu sawiin, a tul dan angin Synod Social Front-in \anpuina sum pawh pek zel an inhuam tih a sawi.
CADS Convener-in an mi mante awmze nei leh mumal zawka Pathian thu hrilhtu tur an mamawh thu a sawi chhuak a, hei hi Synod Social Front-ah lo ngaihtuah an tum tur thu Rev. Lalzuithanga chuan a sawi bawk.
Hetih lai hian, tun hnai khan CADS hnenah hian hengte hian tanpuina an pe bawk: Mission Veng branch K|P - Rs. 5,000; Tuikual North Presbyterian kohhran - Rs. 2,000; Dawrpui MHIP - Rs. 5,000; Lalramthanga, Edenthar - Rs. 1,000; UPC(NEI) North Mizoram district - Rs. 5,000; Chanmari Branch YMA - Rs. 5,000; Durtlang North VCP - Rs. 2,000; Marpara MHIP - Rs. 2,000; LH Enterprise - torchlight 10 leh, RL Rindika, Bungkawn - chini kg. 30. - Buhfai, oil leh gas dinhmun sawifiah Buhfai MT 16,302 hmuh belh - Food, Civil Supplies & Consumer Affairs Secretary, K Riachho chuan, Mizoram sorkarin sorkar laipuia a dil angin, Open Market Sales Scheme hnuaiah thla thum chhung atan buhfai metric ton 16,302 a hmuh belh dawn tih a sawi a; hei bakah hian, thla li chhung dang atan metric ton 20,000 vel pek a thuphungin a rem ti tawh niin a sawi bawk.
Supply Director ni bawk K Riachho hian nimin khan a office-ah thuthar thehdarhtu thenkhatte kâwmin, buhfai, gas leh tuialhtheia Mizoram dinhmun a hrilhfiah a. Mizoramin buhfai khamkhawp a hmuh loh avanga Central-a nikum lam atanga a lo dil tawh angin, OMSS hnuaiah kumin July-September atan buhfai metric ton 16,302 pek belh a remti tih a sawi a; thla khatah MT 6,434 zela pek tur a ni ang.
OMSS hnuaia buhfai hmuh tur hi kg. 1 Rs. 16.14 vel man a ni a, hei hian Mizoram sorkarin buhfai a man toa a lei thin avanga sum lama indaih lohna a neih eng emaw zat chu a phuhru tura ngaih a ni. OMSS hnuaia buhfai hi Mizoramin economic cost-a thla tin a hmuh, MT 8,000 man a pek hnuah chauh zel pek chhuah turin Central chuan a ti a ni.
K Riachho chuan, Mizoramin thla khatah buhfai MT 12,000 (APL, BPL leh AAY quota) vel a hmuh thin thu leh, hei hian mamawh a phuhruk zawh loh thu a sawi a, "Buhfaia harsatna phuhruk turin Central-ah kan dil belh reng a ni," a ti a; chutih rualin, an tih theih bak thil a awm thin thu a sawi.
Tunah hian thingtlangah puitling pakhat tan buhfai kg. 3-a sem a nih thu leh, Aizawl leh district headquarters-ah erawh chuan kg. 2-a sem a nih thu, Supply Secretary chuan a sawi a, "Aizawlah kar hnih danah kg. 2-a sem a ni a, district hqrs dangah kar khatah kg. 2-a sem a ni," a ti. Thingtlangah kg. 3-a sem a nih avang hian, special permit an tihtawp thu a sawi bawk.
K Riachho sawi danin, nimin khan Zuangtuia MUanna Kudamah bufai quintal 11,992 a awm a, thlen belh leh pek chhuah a awm reng a ni.
Supply Director chuan, Mualkhanga Gas Bottling Plant chu sorkar laipui leh IOC-in tihlen an rem ti tawh tih sawiin, ruahmanna siam tawh chu Mizoram Chief Minister leh PWD lam pawhin an pawm tawh tih a sawi a; ram lâk belh a ngaih avangin, harsatna an nei tih a sawi.
Director sawi danin, Mualkhang Bottling Plant tihlenna tura ram hectare 2.66 lâk turah hian, ram nei nia inhriate chu inhriattir turin Revenue department-in a hriattir a, Forest department leh Nikunga, Tuikual-te an inhriattir a ni. Forest atanga objection awm chu Forest leh Supply changtu Minister, H Rohluna'n nikum lam khan Central-ah a bawhzui tawh a, forest clearance chu hmuh harsa lo tura ngaih a nih thu Director chuan a sawi.
Revenue-in ram neite inhriattir tura inhriattir awmchhun, Nikunga'n a ram nia a sawi chu Lalhlimpuii Chawngthu-in a ram a nih thu a sawi leh avangin, tu ram zawk nge tih chingfel turin Revenue department hriattir an ni a; hei hi chinfel a nih chuan, compensation pek ngai pawh pek theih nghal a ni a, sum lamah harsatna a awm loh thu IOC Chairman-in a lo sawi tawh niin K Riachho chuan a sawi bawk.
Gas connection awm zat atanga enin, Mizoram thla khat gas mamawh hi bûr 2,00,000 vel a ni a, tunah hian thla khatah bûr 1,00,000 vel hmuh thin a ni; June-ah phei kha chuan bûr 89,756 chauh hmuh a nih thu Supply Secretary chuan a sawi. Gas agent-te'n an sem dan hriat nan leh dan kalha thil tih ven nan agent-te chu kar khat chhunga gas an sem zawng zawng leh sem dante Thawhtanni apianga Supply Director hnena report tura hriattir an ni.
Petrol leh diesel chungchangah, dealer-te an rinawm a ngaih thu sawiin, "Dealer-te hi Mizoram mipui tan an rinawm a ngai a ni," a ti a; tun hnaia Aizawla pump pahnih suspend te chu ngaihdam an dil avangin ngaihdam an nih thu leh, dan kalha thil ti an man zauh zauh reng thu a sawi.
K Riachho chuan, buhfai, gas leh oil hralh rûkte tihtawp an duh a, mahse an indaih lo tih a sawi a, mipui leh pawlte tanpuina ngenin, "Hralh rûk leh tihchingpen titawp tur hian mipui tanpuina kan mamawh. Kan inzêppui zel chuan ka tirêm thei tak tak lo ang," a ti.
Supply departmnent-ah hian Inspector post 49 awmin, chung zinga 25 chu a ruak a, storekeeper-in store-room an enkawl kawp nual bawk a ni.
